Matalaga asin ipapakuriyat sa bilog na nasyon kan Philippine National Police (PNP) an labi sa sa 11,949 na kapulisan para sa seguridad sa mismong aldaw kan State of the Nation Address (SONA) ni Presidente Ferdinand Marcos Jr. sa papaabuton na Hulyo 28.
Sa sarong pulong balitaan sa Kampo Krame, kinumpirmar ni PNP Spokesperson PBGen. Jean Fajarado na nagpaapod nin sarong command conference an hepe kan Pambansang Pulisya na iyong inatendiran kan mga regional directors partikular na an regional director gikan sa National Capital Region Police Office (NCRPO) tangani pag ulayan an magigin deployment sa aldaw kan SONA kan Presidente.
Pagkatapos man kaini, masagibo man nin sarong coordinating conference an PNP kaiba man an lado kan Office of the Sergeant-at-Arms kan House of Representatives tangani man maplantsa na an nagkapirang mga security protocols na ipapautob sa laog o luwas man kan Batasan.
Kasunod man kaini, ipapautob man an Manila Shield kun saen matao nin dugang na tabang an mga kapulisan gikan sa Police REgional Office III asin Police Regional Office 4A tangani man bantayan asin magpautob nin border controls sa hangganan kan nasyon.
Posible man na magkaigwa pa nin mga minimal na adjustments sa magigin kabilogang deployment sa mismong aldaw kan SONA kun saen pwede man na magamit an mga reserve forces kan nasyon tangani masiguro an kasalbaduhan asin kaayusan sa aldaw na nasambitan.
Mientrastanto, sa presente mayo pang nareresiber na application an Quezon City Police District (QCPD) para man sa pagrerequest kan permit to rally sa mismong aldaw kan SONA.
Saro ini sa mga napag ulayan na sa nagin command conference para sa SONA asin presente nang nakikipag-koordinar an kapulisan sa mga grupo na normal nang nasasagibo an saindang mga rallies tangani masiguro na magigin maayos an ikakasa nindang mga programa.
An mga programa man na plano isagibo kan mga militanteng grupo an tutugutan na sana hasta sa may parte kan Tandang Sora.
Sa presente, nilalaoman na matapos an mga coordinating conference sa pag-ultanan kan PNP asin kan Office of the Sergeant-at-Arms asin masunod nang makikipag-koordinar an Pambansang Pulisya sa mga grupong makasa kan saindang mga programa asin kilos-protesta para sa briefing kun saen sana sinda tutugutang magkasa kan saindang mga rally.
