NAGA CITY – Pigpapautob kan Camarines Sur Police Provincial Office an 5-mins emergency response strategy.
Sa naging paghampang sa mga kagawad kan media ni PCOL Virgilio Olalia Jr., Provincial Director kan nasambitan ng hepatura, sinaysay kaini na saro sa kasugoan sa saindang lado an kadakol na presensya kapulisan sa mga tinampo, orog na an deriktiba kan saindang PNP Chief na 5-mins emergency response strategy.
An siring na deriktiba an mahigot na pigsusunod bako sana kan saindang hepatura alagad magin sa bilog na kapulisan kan nasyon.
Huli digdi, haros urualdaw soboot an saindang pigkukundusir na simulation exercise kun saen nagluluwas digdi na nasusunod ninda an 5-mins emergency response.
Sigun ki Olalia, matinir pa man an mga mobile patrols siring na sana kan motorcycle patrol, beat patrol, roving patrol asin igwa man sinda nin pig-establishar nin place visibility point.
Obheto man kaini an tanganing tulos na marespondehan an nag-apod nin ano man na emerhensiya o insidente sa laog sana kan limang oras.
Mientrastanto, piglinaw man kan opisyal na an siring na oras kan responde an para sana sa Población Areas asin iba man an para sa mga hararayong lugar. Katakod kaini, nakikipagkoordinar man sinda sa mga kasuldadosan orog na kun yaon man ini sa lugar.
