Pig-anunsyar ni Finance Secretary Ralph Recto na posibleng maibweltada an subsidiya kan gobyerno sa Philhealth sa taong 2026, makalihis ining halian nin dugang na pondo ngunyan na taon.
Sigun ki Recto, P53.26 billion an pigsuhestiyong subsidiya para sa PhilHealth sa masunod na taon, mas hababa nin 28.44% kumparar sa P74.43 billion na suhestiyon kan nakalihis na taon para sa 2025, alagad hinali ini kan Bicameral Conference Committee makalihis na mahiling na igwang P280.575 billion reserve fund an PhilHealth.
Sa ngunyan nag abot na sa P145.36 billion an nabayadan kan PhilHealth sa benefit claims hasta kan nakalihis na Hunyo kan presenteng taon, haros doble kumparar sa P76.86 billion kan nakalihis na parehong panahon kan nakalihis na taon.
Sa ibong kan zero subsidy, pigsierto ni Fund Management Sector Senior Vice Renato Limsiaco Jr., na kaya pa man soboot kan Philhealth na pondohan an mas mahewas na benipisyo kaini.
Piglalaomang kayang maabot sa P348 billion an pondo kan PhilHealth sa pagtapos kan 2025.Dugang pa ni Recto, papakusugon kan gobyerno an serbisyong pangsalud asin mga ospital kan DOH, orog na sa mga probinsiya kun saen kulang pa an mga ospital.
Apwera digde, obheto kan gobyerno an zero-balance billing, kaibahan sa mga specialty hospitals.Piglinaw man ni Recto na mayong planong langkawan an kontribusyon kan mga miyembro sa PhilHealth sa masunod na taon.
Marurumdumang, pigsugo kan DOF an PhilHealth na ibalyo an P89.9 billion sa National Treasury, huli ta naglampas sa P500 billion an saindang reserve fund.
Alagad makalihis an mga batikos gikan sa manlaen-laen na sektor asin an TRO gikan sa Korte Suprema, P60 billion pa sana an naibabalyo kan PhilHealth.
