NAGA CITY- Nanindugan an NFA-Camarines Sur na magayon an kalidad kan pigpapabakal na P20 na kilo kan bagas.
Sa entrevista kan Bombo Radyo Naga ki Marbin Malabanan, Officer-In-Charge, Branch Manager kan NFA-Camarines Sur, sinaysay kaini na marhay asin magayon an kalidad kan bagas na nakaimbak sa saindang mga warehouses.
Sigun pa ki Malabanan, bagong ani ini asin bagong mulino na gikan sa pigpabakal na paroy kan mga lokal na paraoma.
Dugang pa kan opisyal, enkaso igwa man nin parong dae boot sabihon na raot na alagad gikan an parong sa pigbubugtak sa bagas tanganing mantiniron an magayon na kalidad kaini.
Apwera digde, antes na itao sa mabakal pirme soboot na pigche-check kan saindang mga personahe an bagas tanganing malikayan an mga reklamo gikan sa mga consumer na nag-a-avail kaini.
Mientrastanto, pig-enkaminar man ni Malabanan an publiko na enkaso igwang reklamo sa saindang nabakal na bagas tolos soboot na makipag-koordinar sa sainda tanganing maribayan nin bago.
Mayo man soboot problema sa pagpapahayag kan saindang mga agrangay kaipuhan sana na ipaaram ini sa saindang opisina tanganing masimbagan man kan saindang lado.
Sa ngunyan, padagos an pagmonitor kan ahensiya sa kamugtakan kan saindang mga warehouses siringman sa pigbabakal na paroy tanganing masierto na igwang bastanteng suplay na magagamit sa panahon kan kalamidad.
