Aram baya nindo mga ka-bombo, pig-arestrar kan mga pulis gikan sa India an sarong lalaki na pig-aakusaran na nagpapadalagan kan sarong pekeng embassy sa sarong pigrerentahan na edificio sa Ghaziabad kun saen nagpamalo-malo pa ini na ambassador kan gibo-gibo sanang nasyon siring kan Seborga o Westarctica.
Susog sa report, nabiktima kan lalaki an kadakol na mga indibidwal asin kompanya sa paagi kan pagpamalo-malo na ambassador kan gibo-gibo man sanang micronations.
Nagpopromesa soboot an lalaki nin trabaho asin negosyo karibay kan kwarta.
Binisto an lalaki na si Harshvardhan Jain kun saen nagbugtak ini nin pekeng embassy sa Ghaziabad sa Kavi Nagar area, kun saen pigpresentar kaini an sadiri komo mayaman asin well-connected diplomat sa paagi kan mga pekeng dokumentos, pekeng plaka kan lunadan asin gibo-gibo sana foreign connections tanganing makapangbiktima.
Katakod digde, pig-arestrar an 47-anyos na suspek kan Special Task Force (STF) kan Uttar Pradesh Police makalihis na salakayon an pekeng embassy kaini sa Ghaziabad.
Narekober kan mga otoridad an pekeng diplomatic number plates, pekeng diplomatic passports kan 12 na micronations, pekeng stamps kan nasa 34 different na nasyon, kwarta asin koleksyon kan mga mahahalon na relo.
Sigun sa sarong senior police officer an lalaki an pinagtutubudan na imbwelto sa money laundering sa paagi kan sarong kompanya sa mga nasyon siring kan UK, Mauritius, Dubai asi iba pang African nations.
