NAGA CITY- Kamawotan soboot kan alkalde kan siyudad nin Naga na madangog asin magin laog kan ika-apat na State of the Nation Address ni Presidente Ferdinand Bongbong Marcos Jr an mga kasimbagan sa pinaka-urgent na concern kan mga Pilipino.
Sigun ki Naga City Mayor Leni Robredo, saro sa mga main concern kan mga Pinoy iyo an kapagteosan asin gutom na padagos na nagigin kalbaryo kan kadakol na mga Pinoy sa presente.
Apwera digde, an madangog an konkrektong plano kan gobierno sa pagbaha na naeksperyensiyahan kan kadakol na areas sa bilog na nasyon.
Sierto soboot kaya na ini man an mawot na maaraman o madangog kan mga Pilipino na nalubog sa tubig baha an saindang mga kaharongan.
Marurumduman, enot nang pigsaysay kan Presidente na laoman soboot na na magigin kakaiba an SONA ngunyan na taon huli ta nakabase ini sa presenteng huma asin kamugtakan kan nasyon.
Mientrastanto, sa ika-apat na SONA kan Presidente ipe-presentar an presenteng kamugtakan kan nasyon asin an mga programang pigpuonan sa irarom kan saiyang administrasyon na piglaloman na magpapadagos hasta sa huring parte kan saiyang pamamayo komo Punong Ehekutibo kan nasyon.
