Nagpakol na sa P1.96 billion an danyos sa sektor nin agrikultura kawsa kan habagat asin magkakasunod na bagyong Crising, Dante, asin Emong, sigun sa report kan National Disaster Risk Reduction and Management Council (NDRRMC) ngunyan na Miyerkules, Hulyo 30.
Apektado digde an 66,989 na paraoma asin parasisira, kun saen an pinakadakulang danyos iyo an nairehistro sa Region 3 (P1.1 billion), sinundan kan MIMAROPA, Region 1, asin CALABARZON.
Mientrastanto, nag abot man sa P9.5 billion an pigkakarkulong kantidad nin danyos sa mga imprastraktura sa manlaen-laeng rehiyon.
Nasa 37,557 na kaharungan man an nairehistro na nadanyusan, mantang labi man sa 7.4 million katao o labi sa 2 million pamilya an naapektaran. Sa numero na ini nag abot man sa labi sa 113,000 katao an nagtitinir pa man sa mga evacuation center.
Nairehistro man an 34 katao na gadan (duwa an kumpirmado), 7 nawawara, asin 22 lugadan. Mientrastanto padagos an isinasagibong beripikasyon sa mga datos, susog sa NDRRMC.
