Naglangkaw na sa haros kabangang milyon na Pilipino an mga natukoy na apektado kan very strong El Niño.
Base sa datos kan National Disaster Risk Reduction and Management Council (NDRRMC), nasa kabilugan na 459,356 indibidwal an apektado kan tagtuyot na linalaoman na magpapadagos pa sagkod sa enot na kabtang kan 2027.
Ini katumbas kan 123,635 na pamilya.
Base pa sa datos kan NDRRMC, an Cagayan Valley an ibinibilang na pinaka-apektadong rehiyon, huli sa mahiwas na kaumahan na sa presente nakakaeksperiencia na nin tagtuyot.
Sinusundan ini kan Region IV-A (Calabarzon), Region IV-B (Mimaropa), Region 5 (Bicol), Region VIII (Eastern Visayas), asin Region XIII (Caraga).
An Cagayan Valley man an nakapagtala kan pinakadakol na biktima kan tagtuyot.
Segun sa NDRRMC, regular nindang ginigibo an pagmonitor sa realtime report kan lambang Office of Civil Defense field office tanganing matukoy an angay na mga lakdang na gigibohon kan gobyerno bilang kasimbagan sa mahiwas na epekto kan nasabing weather phenomenon.
