NAGA CITY- Pigheras kan sarong City Councilor sa siyudad nin Naga na naaprubahan na kan nakalihis na session an validity kan Persons with Disabilities ID.
Sigun ki Naga City Councilor Elmer Baldemoro, gikan sa tolong taon na validity ini an madurar na hasta limang taon.
Katakod digde, piglinaw kan opisyal na strikto soboot sinda sa paghagad kan mga PWD ID orog na ta kan mga nakalihis na bulan o taon igwang nairehistro na pang-aabuso digde.
Dugang pa ni Baldemoro, igwa na mga kakundian an nararahay kun kaya sinda soboot an dae naman entitled pa tanganing makareseber nin mga benipisyo o tabang.
Apwera digde, kinakaipuhan na residente sinda kan siyudad nin Naga nin huli ta igwang pigtatao na tabang o kaya igwang mga programa na sa Naga sana makukua.
Paliwanag pa kan opisyal, igwang mga PWD an nagbabalyo-balyo kan saindang istaran, dapat soboot at least 6 months nang residente kan siyudad an saindang pig-aaako.
Mientrastanto, pigsaysay man kan konsehal na padagos an saindang pagkundusir kan pig-aapod na PWD Congress orog na ta sa paagi kaini, naipapaliwanag an dapit sa PWD code, mare-re-evaluate an programa para sa nasambitan ng sektor asin maipapaabot man kan mga ini an saindang mga agrangay.
Sa ngunyan, pigsierto kan opisyal na yaon an saindang paglalapigot tanganing dae mapabayaan an mga vulnerable sectors sa siyudad nin Naga.
