Nakaka-eksperyensya ngunyan nin matinding flash flood an hilagang parte kan India kun saen tinangay an nagkapirang kaharungan, hotels asin igwa pa na nagrasay na shops na nagin rason sa pagkagadan sa apat na katao mantang kadakol an pinagtutubudang naipit sa irarom kan mga debris.
Basado sa nagkukuriyat na video online, mahihiling an marikas na pag-agos nin tubig na may kaibahan nin mga debris gikan sa bundok pasiring man sa village kan Dharali sa Uttarkashi District kan India.
Madadangog man sa video na nagkukurahawan an mga residente huli sa panic.
An biglaan asin matinding pagbulos nin uran sa saradit na lugar na bistado sa apod na cloudbursts an bihira na nangyayari sa Uttarkashi, na sarong Himalayan region na madalas na bahaon asin naka-eksperyensya nin landslides tuyong monsoon season.
An cloudburst an may potensiyal na maghasik nin matinding danyos huli sa labi na pagbaha asin pagrasay nin daga na nakaaapektar sa rinibong katao sa bulubunduking rehiyon.
Basado pa sa weather agency kan India, pigkakarkulong makaka-eksperyensya pa nin mas magagabat na pag-uran sa rehiyon sa mga masunod na aldaw.
Nag-abiso na man an mga awtoridad sa mga eskwelahan na kanselaron muna an mga klase sa mga apektadong distrito.
