NAGA CITY – Nakakaapektar an presyo kan paroy sa kalidad kaini kun saen kaipuhan na magsunod sa tamang proseso tanganing mas magin marhay an tubo kan pananom.
Sa entrevista kan Bombo Radyo Naga ki Lovella Guarin, Spokesperson kan Department og Agriculture – Bicol, sinaysay kaini na halangkaw soboot an bakal kan mga traders kun hybrid an paroy, siring man nagsusunod man soboot an mga ini kun ano an magigin presyo kan National Food Authority (NFA) tanganing dae man madehado an mga sararadit na mga paraoma na sainda man nagpapasiring.
Dugang pa sa presyuhan man kan hybrid, mas halangkaw ini nin 50 centavos hasta P1 kumparar sa ibang klase kan binhi kan paroy, kun saen sigun pa soboot sa mga traders na sa ngunyan naglangkaw nin P1 hasta P1.50 an presyo kan paroy huli man sa pagpauntok kan importation.
Sigun pa ki Guarin na kun hybrid an itinanom kan mga paraoma mas darakula an butil asin mas magabat an paroy, kaya mas magigin magabat man an bagas kaini na maresulta kan mas dakulang kita kan mga paraoma orog pa kun an mga ini an nagsunod kan tamang protocol kan pagtatanom na mahihiling man sa mga sakong pinagmugtakan kan mga binhi.
Mientrastanto, padagos man an pagtatao nin libeng banhi na hybrid kan DA asin pa igwa soboot sindang after scale services kun saen an mga supplier kan mga binhi an nagpapasiring pa mismo sa mga paraoma tanganing tukduan orog na an mga nagkakaproblema sa pagtatanom kan hybrid.
Sa ngunyan, pagiromdom na sana ni Guarin orog na sa mga paraoma na dae magduwa-duwa na maghagad nin tabang sa DA o sa Municipal Agriculture Office sa mga mawot na magpatabang kun tano an tamang pagtatanom partikularmente na kan hybrid tanganing mas magin marhay an kalidad kan mga pananom.
