Nagpepreparar na an legal team ni dating Presidente Rodrigo Duterte para sa nararaning confirmation of charges hearing sa International Criminal Court (ICC) sa The Hague, Netherlands na gaganapon sa Setyembre 23.
Kinumpirmar ini ni Vice President Sara Duterte sa saiyang patara-tara sa pagtiripon kan Filipino community sa Kuwait.
Apwera digde, ibinunyag man ni VP Sara na igwang saro pang dokumentong pigpepreparar kan defense team, alagad dae ninda ini piglalahad huli ta dae pa ini naipapasar sa korte.
Binanggit man kan Bise Presidente an mga naenot ng lakdang kan defense team, siring kan pagkwestyon sa hurisdiksiyon kan ICC asin an kahagadan para sa paramientras na paglaya kan dating Presidente.
Nakatalaang liwat na maghampang sa ICC Pre-Trial Chamber 1 an dating Presidente sa masunod na bulan para sa confirmation of charges katakod kan kasong crimes against humanity huli sa soboot mga paggadan sa irarom kan war on drugs.
