Sinuspinde kan Commission on Elections (COMELEC) an pag-imprenta kan mga opisyal na balota para sa Bangsamoro Parliamentary Elections makalihis na maaprobaran kan Bangsamoro Transition Authority (BTA) Parliament an sarong prosopwestong ley na liwat nagbabanga sa pitong pwesto sa parlyamento na orihinal na nakalaan para sa probinsiya kan Sulu.
Sigun ki COMELEC Chairman George Erwin Garcia, nakatalaan kudta ng puonan ngunyan na aldaw an pag-imprenta kan mga balota para sa Basilan, Tawi-Tawi-asin sa Special Geographic Area (SGA), alagad ipinagpauktaba ini dara kan papasar sa 3rd asin final reading kan Parliament Bill No. 351.
Obheto kan nasambitan ng prosopwesto na baguhon an Bangsamoro Autonomy Act No. 58 asin liwat iheras an pitong pwesto kan Sulu makalihis magpasyar an Korte Suprema kan nakalihis na taong-2023 na bakong parte kan Bangsamoro Autonomous Region in Muslim Mindanao (BARMM) an nasambitan ng probinsiya, huli man ta tinutulan kaini an Bangsamoro Organic Law kan taong-2019 na plebisito.
Sa irarom kan bagong pagbarangaan, makakakua nin siyam na pwesto an Lanao del Sur, tig-limang pwesto an Maguindanao del Norte asin Maguindanao del Sur, apat an Basilan, apat an Tawi-Tawi, tolo an Cotabato City, asin duwa an Special Geographic Area.
Piglinaw ni Garcia na pighahalat pa kan poll body an opisyal na kopya kan prosopwestong ley tanganing maaraman kun tulos ba ining ipapautob sa maabot na eleksiyon o sa 2028 elections na.
Kun maisasaley kaya ini antes an Oktubre, kinakaipuhang bukasan liwat an filing kan certificates of candidacy huli sa pagbabago kan numero kan pwesto, bagay na makakaapektar man sa ballot face template.
Siring man, pigsierto ni Garcia na madadagos an Bangsamoro Parliamentary Elections sa Oktubre 13 kan presenteng taon, igwang 73 o 80 man na pwesto sa parlyamento.
