Nanindugan si Senate Deputy Minority Leader Sen. Risa Hontiveros na igwang malinaw na legal basis asin bastanteng rason an Pilipinas tanganing isuko si Kingdom of Jesus Christ (KOJC) leader Pastor Apollo Quiboloy sa Estados Unidos.
Sigun sa senador, maski na igwang presenteng pigkakahampang na kaso si Quiboloy sa Pilipinas, pwede pa man ining darahon sa US tanganing hampangon paramientras an kaso kaini duman, saka ibweltada sa Pilipinas tanganing panimbagon ini sa saiyang nagibong krimen sa nasyon.
Dugang pa ni Hontiveros, igwa man mga nagin biktima an pastor sa US na haloy na man soboot naghahalat nin hustisya asin dae na man soboot tama na pahaluyon pa an saindang mga ipinaglalaban huli saro sana ining pag-delay sa hustisya na mawot makua kan mga biktima.
An pagtugot man kan gobyerno sa sarong temporary surrender an soboot sarong paagi kan pagtabang sa mga biktima sa Amerika mantang pigsierto na dae mawawara an mga kasong pigkakahampang kan pastor sa Pilipinas.
Mientrastanto, pigtawan-duon man ni Hontiveros kun pano pigpoporbaran ni Quiboloy na gamiton an saiyang impluwensiya asin kwarta tanganing makalikay sa saiyang paglilitis.
Sa ibong kaini, mayo pa soboong pormal na extradition request na nareresebir an Department of Justice (DOJ) gikan sa US Embassy.
