Dae na pigbaba pa kan National Disaster Risk Reduction and Management Council (NDRRMC) an ‘Blue Alert’ status maski nakaluwas na nin nasyon an bagyong Isang.
Sigun ki Office of Civil Defense (OCD) Spokesperson Junie Castillo, nagtitinir sa Blue alert an status kan NDRRMC asin OCD huli sa Low Pressure Area (LPA) na nasa laog kan Philippine Area of Responsibility (PAR) kaibahan na an epekto kan Habagat.
Boot sabihon, mas kadakol nang duty officers an nakatalaga sa NDRRMC tanganing magtutok sa monitoring asin koordinasyon.
Kabali sa mga pigpa-apod tanganing magtabang sa operasyon an dugang na personahe gikan sa Armed Forces of the Philippines (AFP), Philippine National Police (PNP), Philippine Coast Guard (PCG), asin iba pang ahensya kan gobierno.
Nakapreparar man an mga rescue equipments asin mga family food packs.
Mientrastanto, obheto kan lakdang na masierto an marekas na pagsimbag enkaso kaipuhanon sa tahaw kan raot nin panahon.
