NAGA CITY- Makakatuwang kan lokal na gobierno kan siyudad nin Naga an Kabalikat Civicom para sa papaabuton na selebrasyon kan Peñafrancia Fiesta.
Sa entrevista kan Bombo Radyo Naga ki Jun Viola, Naga City President Voice of Naga Communicators Federation (KABALIKAT CIVICOM), sinaysay kaini na sa pigkundusir na meeting nagbilog soboot sinda nin Federation na inaapod na Voice of Naga Communicators Federation.
An nasambitan ng grupo an kaipuhan tanganing makapagtao nin mas marekas na komunikasyon sa mga kinakaipuhan na marespondehan sa pagdagsa kan mga tawo sa siyudad nin Naga sa Peñafrancia Festival.
Sigun ki Viola, igwa na soboot sindang kanya-kanyang deployment kun saen an Kabalikat Civicom an naka-assign sa civic parade partikular sa stage mantang an iba an naka-assign man sa Panganiban hasta sa temporaryong plaza.
Dugang pa kan opisyal, pigsaysay man soboot kan PSO na saro pa an saindang grupo sa matabang sa gabos na kahiruan sa siyudad sa bilog na durasyon kan kasiributan.
Mientrastanto, pig-orgulyo man ni Viola na nagtitinir na marhay an pag-iribahan kan saindang grupo na makakatabang man sa panahon kan pangangaipuhan.
Sa ngunyan, naglalaom na sana ini na magigin matrayumpo an pagselebrar kan Peñafrancia Festival ngunyan na taong 2025.
