Pighali na kan Constitutional Court si Prime Minister Paetongtarn Shinawatra sa puwesto kan nakalihis na Biyernes, Agosto 29, huli man sa pagbalgar sa ethics, makalihis sana an sarong taon sa panunungkulan.
Si Paetongtarn, 39 anyos an pinaka huben na Prime Minister kan Thailand asin aki kan dating PM na si Thaksin Shinawatra. Ini na ika-anom na lider gikan o sinuportaran kan bilyonaryong Shinawatra family na nahali man sa puwesto kan militar o korte sa laog nin duwang dekada.
Sigun sa korte, pigbalgar soboot ni Paetongtarn an ethics makalihis man an sarong leaked phone call kan nakalihis na bulan nin Hunyo, kun saen garu nagpakumbaba ini sa dating lider kan Cambodia na si Hun Sen sa tahaw man kan tensyon sa border kan duwang nasyon. Pirang semana man makalihis an nagin apod, sumiklab an limang aldaw na labanan sa border.
Huli sa ruling, kinakaipuhang pumili an parliyamento nin bagong prime minister.
Mientrastanto, pamamayuhan muna kan Deputy Prime Minister Phumtham Wechayachai asin man kan presenteng gabinete an gobyerno komo caretaker.
Apwera digde, an natatadang kandidato gikan sa Pheu Thai Party iyo an si Chaikasem Nitisiri, 77 anyos asin man dating attorney general. Siringpaman, may hababang profile ini asin kulang sa eksperyensya sa gabinete.
Kabali pa sa ibang posibleng kahalili iyo an si Anutin Charnvirakul, na dating deputy PM, asin si Prayuth Chan-ocha na dating lider kan coup kan nakalihis na taong 2014, na ngunyan an retirado na sa politika.
Huli man sa pagbabagong ini, naglangkaw pa an tensyon sa Thailand, na presenteng nag aatubang sa maluya na ekonomiya asin man kawarang-kasiguruhan sa reporma. Sigun sa mga analyst, madidipisilan na magtinir sa poder an Pheu Thai huli sa mahimpis na mayorya sa koalisyon.
