Nagpakol sa duwa sana gikan sa dose na luxury vehicles na pigtukoy sa search warrant an nadiskubrer kan Bureau of Customs (BOC) sa raid na pigsagibo sa mga pagsasadiri kan pamilya Discaya kasubagong aga, sigun ki BOC Chief of Staff Jek Casipit.
Sa sarong pahayag pigsaysay ni Casipit, sulamenteng sarong Toyota Land Cruiser asin sarong Maserati sana an nahiling sa lugar.
Mantang an iba pang lunadan na nakalista sa warrant an mayo sa property kan mga Discaya.
Alagad pig-ako man ni Sarah Discaya na igwang 28 luxury cars an saindang pamilya, dose sa mga ini an yaon sa search warrant o mga lunadan na mayong record sa Customs.
Kabali sa mga pigtukoy sa warrant an mga high-end na lunadan siring kan Rolls Royce Cullinan, Mercedes-AMG G63, Bentley Bentayga, asin Lincoln Navigator.
Dugang pa ni Casipit, duwang beses nindang pigpurbaran na isunad an warrant kan nakalihis na Lunes nin bangi alagad dae sinda pinalaog.
Kun kaya, kasubagong aga na sinda pigtugutan na makalaog asin magkundusir nin inspeksyon.
