Pigbubusol ni Senador Ronald “Bato” Dela Rosa an pagbabalik kan padusang kagadanan para sa mga opisyal kan gobyerno asin indibidwal na mapapatunayang nagkasala nin plunder.
Sa irarom kan Senate Bill No. 1343, pigsuhestyon ni Dela Rosa na amyendaran an Republic Act No. 9346, an ley na nag-hali kan death penalty sa Pilipinas, tangani liwat na ipataw an pinakamagabat na padusa kontra sa mga imbwelto sa pandarambong.
Sa paagi kan lethal injection an itinutulak na paagi kan padusang kagadanan.
Pigtawan duon kan senador na an pagkakaimbwelto mga tiwaling opisyal sa mga maanomalyang flood control projects na pigbuyagyag mismo ni Presidente Ferdinand Marcos Jr., malinaw na ebidensiya kan mahewasang korapsyon sa gobyerno.
Basado sa datos kan Department of Finance, pigkakarkulong nasa ₱42.3 bilyon hasta ₱118.5 bilyon an nawawara sa ekonomiya kada taon huli man sa katiwalian sa mga proyektong flood control magpuon 2023 hasta 2025.
Katampad soboot ini kan pagkawara kan 95,000 hasta 266,000 trabaho na kuta an pigkriar para sa mga Pinoy.
Pigbuyagyag man na may umiiral na “kickback scheme” kun saen hasta sa 30 porsiyento kan kantidad kan proyekto an napapasiring sa mga politikong pigtutukdong utak kan anomalya, mantang an natatadang porsiyento an pigbabanga banga sa mga opisyal kan Department of Public Works and Highways (DPWH), contractors, district engineers, asin auditor.
Sigun ki Dela Rosa, dae bastante na kulungan sana an padusa sa mga siring na klase kan krimen na kumikitil nin pagkakataon kan mga kahimanwa na magkaigwa nin pakarhay na pamumuhay.
Hurot pa kaini, an mga tiwaling opisyal na piniling payamanon an sadiri sa tahaw man kan pagsasakit kan kadaklan an dapat na manimbag hasta sa huring padusa.
