Nagtutubod si dating presidential spokesman Atty. Harry Roque na igwang bastanteng basehan sa Rome Statue tanganing hagadon an pagbasura kan kaso kontra ki dating Presidente Rodrigo Duterte.
Ginibo kan dating presidential spokesman an pahayag sa saiyang live video broadcast makalihis hagadon kan defense counsel kan dating Presidente na i-adjourn indefinitely an gabos kan legal proceedings o paglilitis sa saiya sa International Criminal Court (ICC) huli man ta sigun sa depensa, igwang “signifant cognitive deficiencies” an dating Presidente kun saen ultimo miyembro kan saiyang pamilya sin defense team, dae na kaini marumduman asin dae maproseso an nature asin implikasyon kan paglilitis kontra sa saiya.
Komo basehan, tinukoy ni Atty. Roque an nagkapirang probisyong nakasaysay sa Rome Statue igwang koneksiyon sa karapatang pantao asin interest of justice kun saen dapat na soboot maibasura an kaso kun dae na kayang hampangon kan dating president an mga paratang kontra sa saiya orog na kun mayong bastanteng kakayanan particularment an sa pag-iisip huli ta dae ini magigin makatawo asin maikokonsiderar na “arbituary detention” o pagkulong sa sarong indibidwal nin mayong legal na basehan o marhay na due process, na nagbabalgar sa saiyang derechos para sa Kalayaan.
Kaya kumpiyansa soboot si Roque na tutugotan an interim release kan dating Presidente huli ta kun dae, maluwas ini na illegal detention huli ta dae pa man soboot napapatotoohang nagkasala an dating president.Alagad maski ipinaliwanag man ni Atty. Roque na bako ining siring kan ley sa Pilipinas, bakong basehan sa Rome Statue an kawaran kan abilidad na masabutan an paratang kontra sa Presidente tanganing maibasura an kaso.
Kaya bakong motion to dismiss an pigsunad kan depensa kundi tanganing i-adjourn indefinitely an proceedings o paglilitis sa dating president. Boot sabihon, dae pa man ibabasura an kaso kundi dae sana ini mapadagos asin matinir na akusad o pa man an dating Presidente asin dae mapapalaya.
Enkaso man soboot na mapalibre, ini an sa bisa kan pig-aapod na interim release kun saen kaipuhan igwang host country o mag-ako na nasyon sa dating Presidente.Alagad binanggit man kan dating presidential spokesman an mga posibleng ulang sa interim release kan dating Presidente.
Ipigladawan kaini an kaso kan kaibahang nakadetine ni dating Presidente Duterte sa The Hague, na si Félicien Kabuga, sarong Rwandan businessman na nahahampang sa kasong genocide asin crimes against humanity.
Sa ibong kan saiyang malalang mental health condition huli sa alzheimers asin dementia asin kawaran nin kakayahan tanganing maghampang sa trial, nagtitinir pa man ining nakakulong huli ta mayong nasyong nag-ako sa saiya sa paagi kan interim release.
