Inireport kan Department of the Interior and Local Government (DILG) na nag-abot sa 94.42% an efficiency kan bagong Unified 911 emergency hotline sa enot na aldaw kan operasyon kan nakalihis na ika-11 kan Setyembre 2025.
Sigun ki DILG Secretary Jonvic Remulla, ini an sarong dakulang lakdang sa modernisasyon kan emergency response system kan nasyon.
Sa kabilogang 60,323 na apod, 57,786 an matrayumpong narespondehan, mantang 3,537 an tinukoy na test, abandoned, o prank calls.
Harayo ini sa datos kan nakalihis na 2024, kun saen 48.33% sana kan mga apod an nakapotan.
Kan enot na parte kan 2025, nagsakat ini sa 70.71% hasta sa maabot an presenting lebel sa irarom kan Unified 911 system.
Mientrastanto enot nang nagpatanid si Remulla kontra sa mga naggigibo nin prank calls na pwedeng isairarom sa last priority an saindang mga numero.
Nagpautob na man an DILG nin verification protocols tanganing masierto na mayong totoong emergency na dae marerespondehan, kaibahan an follow-up gikan sa pulisya o barangay officials.
