Nagpaabot nin suporta si Israeli Prime Minister Benjamin Netanyahu sa plano ni US President Donald Trump tanganing mauntok na an giyera sa Gaza.
Personal na nagbisita si Netanyahu sa White House kun saen pigsaysay kaini na an nasambitan ng desisyon sarong kritikal na lakdang tanganing mauntok na an giyera asin maabot an katuninongan sa Gitnang Silangan.
Pigpasalamatan man ni Trump si Netanyahu makalihis na akuon kaini an saiyang plano.
Preparado man si Trump na pangenutan an transitional “Board of Peace” para sa Gaza.
Nagtutubod man si Trump na masimbag man an Hamas sa mga kondisyon na pigpresentar kaini tanganing mapundo na an kariribukan.
Kaibahan sa mga plano an paramientras na magin liderato an Gaza kan technocrat government asin dae tutugutan na kubkubon kan Israel.
Mayong hahalion sa Gaza huli ta ini liwat ititindog asin pag-inako na an plano tulos na iuuntok an giyera asin sa laog kan 72 oras papalibrehon an mga bihag.
An mga Hamas na masimbag tatawan nin amnestiya mantang an kontra tatawan nin tsansa na makahali asin magduman sa mga nasyon na aakuon sinda.
Katakod digde, an Regional asin International forces an matao nin seguridad kun saen sasanayon ninda an mga Palestine police asin gabos na tabang mabulos sa Gaza.
