NAGA CITY- Pigsaysay kan Philippine Coast Guard na an mga operasyon kan mga pantalan sa Bicol Region partikularmente an mga ruta pasiring sa Masbate an balik normal na makalihis an panlalamasa ni Bagyong Opong an nakalihis na semana.
Sigun ki PCG-5 commander Commodore Ivan Roldan, siyam na vessels an available kada aldaw pasiring asin pahali sa Masbate na igwang poco mas o menos 155 na rolling cargoes kada aldaw.
Dugang pa kan opisyal, pigmomonitor kan saindang ahensiya an gabos na pantalan sa Masbate tanganing masierto na gabos na asistensiya na gikan sa mga hararaning probinsiya an dae nade-delay.
Para sa probinsiya kan Masbate, yaon an pantalan siring kan Mintac, Mobo, Masbate, Cawayan, Cataingan asin Aroroy kun saen gabos ini an operational.
Mientrastanto, apwera sa pagsierto kan marhay na operasyon sa mga pantalan, nagtao man an PCG nin duwang water purifiers asin desalination sa provincial government kan Masbate.
An equipment na ini an kayang makapagprodusir nin 10,000 liters kan potable na tubig kada aldaw na kun saen an duwang units an igwang pinagsarong kapasidad na nagpapakol sa 20,000 liters kada aldaw.
Sa ngunyan, labi 100 PCG personnel an pig-deploy kan provincial disaster risk reduction management council tanganing magtaong asistensiya sa probinsiya kan Masbate na labing naapektaran kan Bagyong Opong.
