Makikipag-ulay an Bureau of Customs (BOC) sa Independent Commission for Infrastructure (ICI) sa aldaw nin Biyernes, Oktubre 3.
Sigun ki BOC Commissioner Ariel Nepomuceno, obheto kaini an tanganing isumiter an mga dokumento na kaipuhan na makakatabang sa saindang imbestigasyon.
Isinagibo kan opisyal an pahayag matapos na dagusan nindang ikustodiya an 13 luxury cars na pagsasadiri kan mag-agom na contractors na sinda Pacifico “Curlee” asin Cezarah “Sarah” Discaya na pig-iimbwelto sa amonalya sa flood control projects.
Dugang pa kaini na an primerong mga dokumento na saindang isusumiter sa ICI iyo an resulta kan saindang imbestigasyon sa luxury cars kan mga Discaya.
Pigsierto man ni Nepomuceno na makikipagtabangan sinda sa ICI asin saindang itatao an anuman na kaipuhan na dokumento para sa saindang imbestigasyon.
