Pigpaliwanag ni Ombudsman Jesus Crispin Remulla na posible pa man giraray mapadusahan si Vice President Sara Duterte sa salang paggamit kaini kan milyun-milyun pisong confidential fund kan saiyang opisina asin kan Department of Education (DepEd).
Sa sarong entrevista ki Ombudsman Remulla, pigpaliwanag kaini na pwede pa man giraray mapanimbag si VP Sara sa mga kasong kinakahampang kaini alagad dae soboot mapapatalsik sa pwesto.
Sigun ki Remulla an mga makukua nindang ebidensiya asin report sa ginibong imbestigasyon an ipapasa sa kongreso kun saen sinda an madesisyon kun i-impeach an bise presidente.
Apwera digde, pig-ako man ni Remulla na dae pa kaini nababasa an kasong pigsunad ki VP Sara maski pa nagtukaw komo sekretaryo kan DOJ huli ta tolos soboot ining pigsunad prosecutor general sa Ombudsman.
Magin an reklamong pig-endorso kan House Committee on Good Government and Public Accountability an dae pa man nababasa kun kaya tolos kaining ire-review asin pag-aadalan tanganing maaraman kun igwang bastanteng ebidensiya an kaso.
