Pigbubusol ni Senate President Pro Tempore Ping Lacson an “retribution asin restitution” formula sa paghabol sa mga opisyal asin kontraktor na imbwelto sa mga anomalya sa flood control asin iba pang infrastructure projects.
Sigun ki Lacson, posibleng mabawi kan gobierno asin mga taxpayer an lampas P26 bilyon gikan sa contracted flood control ghost projects sa pag ultanan kan 2023 asin 2025 na nagkakantidad nin P629 bilyon, kun ipupuli kan mga imbwelto an 80% kan saindang nakulimbat karibay kan pinalipot na sentensiyan sa kulungan.
Pigtawan duon ni Lacson na an mga makundusir kan imbestigasyon – kabali an Independent Commission for Infrastructure, Ombudsman, Department of Justice asin hudikatura igwang dakulang papel digde.
Pigpaliwanag ni Lacson na an plea bargaining pupwedeng gamiton tanganing masiertong makikipagtabangan an mga nasasakdal, alagad dae soboot makokonsederar na kompromiso.
Dugang pa ni Lacson, pupwede man makabawi kan dugang na kantidad an gobierno kun hahabulon kaini an mga insurance companies na nagserbing surety o garantiya sa mga kuwestiyonableng proyekto.
Pupwede man gamiton an parehong paagi sa iba pang proyekto siring kan farm-to-market roads, school buildings, asin multi-purpose buildings.
Pigbanggit man ni Lacson na dapat gibuhon inspirasyon an anggot na namamatean kan publiko sa mga anomalya tanganing magin marikas an determinasyon kan gobyerno kontra korapsyon.
Mientrastanto, makalihis an saiyang pagbutas komo chairman ng Senate Blue Ribbon Committee, pigsaysay ni Lacson na ma-focus ini sa pagdangog kan 2026 national budget asin sa saiyang trabaho komo Senate President Pro Tempore asin chairman kan Senate Committees on Accounts asin Electoral Reforms and People’s Participation.
