Nagsunad nin apelar an kampo ni dating Presidente Rodrigo Roa Duterte sa International Criminal Court (ICC) makalihis na sayumahan kan Pre-Trial Chamber I an saindang kahagadan na interim release o paramientras na paglaya.
Kinumpirmar kan lead counsel ni Duterte na si Atty. Nicholas Kaufman na pigsunad ninda an apelar sarong semana na an nakalihis, asin inapod kaining sala an nagin desisyon kan hukuman.
Sa iniluwas na 23 na dahong desisyon kan nakalihis na Setyembre 26, pighurot kan ICC na kaipuhang magtinir sa kustodiya si Duterte tanganing malikayang maapektaran an imbestigasyon asin mga proseso.
Tinukoy man kan hukuman an posibilidad na ini fligh risk asin pwedeng makaapektar sa mga saksi.Sinayumahan kan ICC an argumento kan depensa na dapat palibrehon si Duterte huli sa edad asin kamugtakang pangsalud kaini, asin sinabing igwang bastante na serbisyong medikal sa laoh kan ICC Detention Center.
Alagad sigun sa kampo kan dating Presidente, dae soboot naangkop si Duterte na maghampang sa paglilitis huli sa cognitive decline, alagad sinaysay kan mga hukom na mayong bastanteng ebidensiya tanganing patunayan ini.
Mientrastanto, suportado man ni Mamayang Liberal Party List Representative Leila de Lima asin nagkapirang human rights groups an nagin desisyon kan ICC, asin sinabing patunay sana soboot ini na igwang bastanteng basehan an kaso kontra sa dating Presidente.
Nagsayuma man na magtaong komento si Vice President Sara Duterte dapit sa kaso kan saiyang ama, asin sinabing nakatuon muna ini sa mga biktima kan linog sa Davao Oriental.
