Nakatalaang maghampang ngunyan na aldaw Oktubre 14 sa pagdangog kan Independent Commission for Infrastructure (ICI) si dating House Speaker asin presenteng Leyte Rep. Martin Romualdez, kasunod kan imbitasyon na ipinadara sa saiya kan komisyon kan nakalihis na semana.
Sigun ki ICI Spokesperson Atty. Brian Hosaka, inako ni Romualdez an imbitasyon asin man nagpahayag nin kahandaang mag atendir tangani makisumaro sa imbestigasyon kan komisyon.
Kabali sa mga pag uulayang hapot sa pagdangog iyo an proseso kan pagbilog kan national budget kan ini pa an Speaker kan Kamara, siring man an mga detalye kan budget allocations para sa mga flood-control projects na isinagibo sa irarom kan saiyang pamamayo.
Mientrastanto, hahagadon man kan komisyon sa Regional Trial Court na ipa-cite in contempt si dating Rep. Zaldy Co kun liwat ining mabibigo na mag hampang sa pagdangog kan komisyon ngunyan na aldaw, Oktubre 14.
Sigun ki Hosaka, tagapagtaram kan komisyon, posible ining magresulta sa pagluwas kan warrant of arrest kontra sa dating kongresista enkaso na magluwas an korte nin contempt order.
Basado sa report, dae pa man nagsisimbag si Co sa subpoena na ipinadara kan ICI katakod kan imbestigasyon sa soboot maanomalyang flood control projects.
