Pighihiling an pagkriar nin mga livelihood program komo sarong lakdang tanganing mailikay an mga residente sa siyudad nin Naga na maimbwelto sa ilegal an droga.
Sa entrevista kan Bombo Radyo ki Naga City Councilor Ma. Corazon Peñaflor, sinaysay kaini na padikit-dikit naman nababawasan an mga tawong naiimbwelto sa pigpapangalad na bulong sa siyudad huli ta padagos an saindang pagkaulay sa mga magkakanigong opisina na iyong nagmamanehar sa mga imbwelto digde na magkaigwa nin marhay na pagbabago sa saindang buhay.
Katakod digde, kasabay kan pag-urulay dapit sa livelihood binabali man an mga pagirumdom sa mga residente na dae maglaog sa anuman na klase kan iligal na transaksyon patikular an igwang kinaaraman sa droga nin huli ta mayo man ining marhay na maidadara sa sadiri asin sa pamilya.
Mientrastanto, sa pag-implementar kan livelihood program nakapalaog digde an paggibo nin manlaen-laen na pagkakan orog na epektibo ini asin pigkokonsederar na fast moving business.
Kabali pa sa livelihood program an pagtrain sa mga lalaki sa paggugupit tanganing makakua nin pagbuhay asin dae maimbwelto sa pinagbabawal na droga.
Sa ngunyan, hagad na sana kan nasambitan ng opisyal an kooperasyon kan publiko para sa mas marhay na komunidad asin pagsimbag sa problema kan ilegal na droga.
