Tugot soboot an kadaklan sa mga senador na isapubliko an saindang Statement of Assets, Liabilities, asin Net Worth (SALN), sigun ki Senate President Vicente Sotto III.
Sigun ki Sotto, nakaulay na kaini an pira sa saiyang mga kaibahan sa Senado asin kadaklan sa sainda nagtugot na maisapubliko an saindang mga pagsadiri.
Nagtutubod si Sotto na makakatabang an lakdang na ini ni Ombudsman Boying Remulla tanganing mabwelta an tiwala kan publiko sa mga opisyal kan gobierno.
Dugang pa kan opisyal, dae na kaipuhan magpanotaryo an mga mawot maghagad nin kopya kan SALN kan mga senador, orog na kun lehitimo man an kagahagadan na kopya.
Siring na sana sa media, na bistado man na mga accredited asin lehitimong media practitioners.
Mientrastanto, piglinaw kan opisyal dae pupwedeng itao an kopya kan SALN sa kun siisay sana.
Pabor man si Sotto na ma-review an kabilugan kan saiyang yaman.
