Nagsakat na sa 299,786 na indibidwal o 92,590 na pamilya an naireport na naapektaran kawsa kan pagtama kan Bagyong Ramil sigun sa Department of Social Welfare and Development – Disaster Response Management.
Gikan an nasambitan ng numero sa 772 na barangay sa Cagayan Valley, Central Luzon, CALABARZON, Bicol Region, Western Visayas, asin Eastern Visayas na tinamaan kan bagyo.
Sigun sa ahensya, 3,913 na pamilya an presenteng nagtitinir sa evacuation centers mantang 1,705 an nakaistar man sa saindang kanya-kanyang mga kaparientes o amigo.
Mientrastanto, nagpakol man sa P19,706,841 an kabilugang humanitarian assistance kan DSWD sa mga apektadong rehiyon kawsa kan Bagyong Ramil.
Sigun ki DSWD Assistant Secretary at Spokesperson Irene Dumlao na padagos an saindang pagdestrebwer nin tabang sa mga labing naapektaran kan bagyo partikularmente an an Western Visayas.
Dugang pa kaini na nakikipag-koordinar man an DSWD sa mga lokal na gobierno na masierto na nasa marhay na kamugtakan an mga internally displaced persons na nagtitinir sa evacuation centers asin pati naman sa mga paramientras na nakaistar sa saindang mga kaparientes.
