Sinaysay ni Senate President Vicente Sotto III kan nakalihis na Martes na haros sigurado na mabalik si Senador Panfilo Lacson komo chairperson kan Senate Blue Ribbon Committee makalihis magbutas sa puwesto sa tahaw kan mga batikos sa saiyang pagkapot sa flood-control investigation.
Sinaysay ni Sotto na bukas si Lacson na ipagpapadagos an pamamayo sa komite, kawsa kan saiyang pagmumuni-muni sa mga nakalihis na pagdangog asin pagtutubudang kadakol mga importanteng isyu an nagtitinir na dae nareresolbar.
Sigun ki Sotto, magkaulay sinda ni Lacson kan mga nakalihis na aldaw, asin sinabing sigurado nang magkakaigwa nin pag-uulay kan Blue Ribbon Committee asin nahihiling kaining positibo an gabos sa ngunyan.
Dugang pa kaini, nahiling ni Lacson kun ano an mga nangyari kan hearing asin kun ano pa an dapat na madumanan. Kadakol pa an dae nauungkat asin kun ini an talagang makakatabang, an hiling ni Lacson, na mas makakatabang ini sa lado kan ICI, Ombudsman asin courts of justice, sigun pa ko Sotto.
Sinaysay man ni Sotto na an liwat na pagsasaalang-alang ni Lacson an nag abot makalihis madangog an mga apelar gikan sa mga kaparehas senador asin publiko.
Binanggit ni Sotto an importansya kan pagpapakusog sa pig suhestyong Independent People’s Commission tangani pakusugon an gibuhon kan ICI, asin sinabing an pamamayo ni Lacson an magigin importante sa pagtugis kan mga nakabinbing kaso nin katiwalian.
Sinaysay ni Sotto na maogma si Senador Erwin Tulfo, an vice chair asin acting head kan komite, sa posibleng pagbabalik ni Lacson.
Marurumdumang si Senator Lacson an nagbutas sa puwesto kan primerong parte kan bulan, asin sinabing mawot kaining tawan dalan an saro pang miyembro makalihis an pirang mga kaibahan an magpahayag nin kawarang-kaogmahan sa saiyang pagkapot sa imbestigasyon sa soboot mga ghost flood control projects.
Sinaysay ni Sotto na ma ulay an Blue Ribbon Committee sa orog na marikas na panahon tangani pormal na pag ulayan an urulay kan pamayuhan.
