Ila-livestream na an mga pagdangog sa Independent Commission for Infrastructure (ICI) magpuon sa masunod na semana.
Ini an inanunsyar ni Independent Commission for Infrastructure Chairman Andres Reyes sa pagdangog kan Senado dapit sa pagtatatag kan Independent People’s Commission (IPC) tangani na magin permanente na an komisyon na nag-iimbestigar sa mga maanomalyang proyekto sa manlaen-laeng ahensya kan gobyerno.
Pighurot ni Reyes na sa oras na magkaigwa na sinda nin bastante na teknikal na kakayahan, pupuonan na nindang isapubliko sa masunod na semana an mga imbestigasyon katakod sa soboot bilyon-pisong korapsyon sa flood control projects.
Sa ibong soboot na mayo pa sindang pasilidad asin panundunan sa proseso, maaaraman na kan publiko an pagdangog kan komisyon.
Sigun man ki Senador Kiko Pangilinan, saro ining welcome news tangani maaraman kan publiko an development o pag-usad kan ikinakakasang imbestigasyon kan Independent Commission for Infrastructure.
Bukas man si Makati Business Club Executive Director Rafael Ongpin na i-livestream an gabos kan sesyon kan ICI, alagad dapat pa man tawan nin karapatang magdeklarar nin confidential sessions an komisyon kun kinakaipuhan.
Sigun ki Ongpin, bagaman importanteng magin transparent an imbestigasyon, dapat man na likayan na magin “circus” o paluwas an mga pagdangog na pwedeng mapuli sa public shaming kan mga inaakusaran.
Binanggit man ni Ongpin na dapat palan an kapangyarihan kan ICI, siring kan pigsuhestyon man ni Senate President Vicente Sotto III.
Soboot, an komisyon an dapat magkaigwa nin kapangyarihang judicial, investigative, asin confiscatory, siring kan Presidential Commission on Good Government (PCGG) noon.
Kabali digde an power of subpoena, pagdedeklarar nin contempt — kaiba an pag-arestar o pagsusunad nin hold orders makalihis an due process — asin an kapangyarihang magsunad nin kaso nin direkta, tangani dae na kaipuhang mag agi pa sa Ombudsman, Department of Justice, o Office of the Attorney General.
Dugang pa ni Ongpin, kaipuhang pahewason an sakop asin numero kan mga miyembros kan komisyon tangani masimbagan an dakol kan kasong katakod kan anomalya. Hurot kaini, bako sana sa infrastructure projects nag iitok an korapsyon na dapat imbestigaran kan ICI.
Sigun sa saiya, naghehewas na man soboot an impluwensya kan mga tiwaling opisyal sa mga social welfare programs kan gobyerno siring na sana kan mga ayuda.
