Nagtutubod si Mamamayang Liberal Party List Representative Leila De Lima na mayo nin katuturan maski pa iapelar kan kampo ni dating Presidente Rodrigo Duterte an pinakabagong ruling kan International Criminal Court (ICC) na nagpapatibay sa hurisdiksiyon kaini sa crimes against humanity charges kontra sa dating Presidente.
Sa sarong statement, pig-omaw ni De Lima komo “most just” o pinaka-makatarungan an nagin desisyon kan ICC Pre-Trial chamber na nagtututol sa pag-angat kan depensa sa hurisdiksiyon kaini sa kaso, na naghahali soboot sa saro sa primerong ulang para sa ganap na paglilitis.
Inihayag man kan lehislador na hayagang kritiko kan war on drugs ni Duterte, na kasunod kan desisyon kan kapulungan, mas harani na soboot sinda sa pag-abot kan hustisya asin paninimbagan.
Nagtutubod man si De Lima na ibabasura man kan Pre-Trial Chamber an lakdang kan kampo kan dating Presidente tanganing suspendiron an saiyang trial huli sa soboot bogus kan mental incapacity, makalihis tutulan an saiyang hagad na interim release.
Naglalaom man ini na mapupuonan na sa orog na marekas na panahon an paglilitis tanganing maipresenta na kan dating Presidente an saiyang depensa, kun saen magkapirang utro na soboot kaining sinasabi na saiyang hahampangon nin patas an mga akusasyon kontra sa saiya.
