NAGA CITY- Padagos na pigtututukan kan Libmanan Municipal Police Station an pagmanehar kan trapiko para sa Undas 2025.
Sa entrevista kan Bombo Radyo Naga ki PSSG. Juan Batolina, Public Information Officer kan Libmanan Municipal Police, sinaysay kaini na igwa sindang personahe na idedeploy na iyo mang matutok sa traffic management orog na ta piglalaoman an pagdagsa kan mga tawo sa mga sementeryo sa saindang lugar.
Sigun pa ki Batolina, dae sinda maimplementar nin one-way scheme orog na ta maresulta ini sa mas magabat na bulos kan trapiko.
Mientrastanto, padagos man an pagpapatanid kan opisyal sa publiko na dae gabos magsarabayan sa pagpasiring sa sementeryo tanganing malikayan an harabunan orog na ta ini man an panahon na pigsasamantala kan mga kawatan tanganing makapanghabon.
Katakod kaini, pig-orgulyo man ni Batolina na kan nakalihis na taon zero incident sinda kan robbery asin theft huli sa kooperasyon kan publiko.
Apwera digde, yaon man an pagpapagirumdom kan opisyal sa saindang mga residente na bawal an pagdadara nin baraha, makukusog na speaker, arak, patarom asin iba pa.
Sa ngunyan, hagad na sana kaini an liwat na pakikipagtabangan kan publiko tanganing mas magin solemne asin matuninong an pag-obserbar kan Undas 2025.
