NAGA CITY- Makundusir nin massive satellite registration an Comelec-Pili sa mga eskwelahan mapa-pribado o pampubliko man sa banwaan nin Pili, Camarines Sur ngunyan na Nobyembre.
Sa entrevista kan Bombo Radyo Naga ki Atty. Fatima Gados Pani Agua, Election Officer IV kan Comelec-Pili, sinaysay kaini na obheto kan nasambitan ng lakdang an tanganing mairani sa saindang mga residentes partikular sa mga kajovenan an pagpaparehistro.
Sigun pa sa opisyal, maabot sa 200 na mga bagong registrant an saindang piglalaoman na makapag-avail kan nasambitan ng Voters registration orog na sa mga National High School.
Dugang pa ni Pani-Agua, sa presente maluya pa soboot an nagpaparehistro para sa papaabuton na 2026 Barangay asin Sangguniang Kabataan Elections kun saen dae nag-aabot sa sampulo kada aldaw an nagpapapasiring sa saindang opisina para digde.
Alagad sa ibong man kan sitwasyon pigkonsederar kan opisyal na normal ini huli ta piglalaoman ninda na sa masunod na taon pa mabulos an magpaparehistro.
Mientrastanto, sa mga mawot man na magparehistro kaipuhan sana na magdara nin any government issued ID siringman sa mga estudyante o nag-eedad 15-anyos sa aldaw kan election pwede na an xerox copy kan saindang birth certificate o kaya kan saindang School ID.
Pigsierto man kan opisyal na saindang pigtatawan asistensiya an mga indibidwal na dae tatao magbasa o magsurat.
Apwera digde, yaon man an iba pang serbisyong pigtatangro siring kan Transfer, application for reactivation asin iba pa.
Sa ngunyan, hagad na sana kaini an pakikipag-koordinar kan saindang mga residentes para sa mas matrayumpong pagkundusir kan Voters’ Registration.
