Kahagadan ni House Speaker Faustino “Bojie” Dy III na tolos maipasar an mga prosopwestong ley na obhetong mapakusog an kapangyarihan kan Independent Commission for Infrastructure o ICI na iyong nag-iimbestigar sa maanomalyang flood control projects.
Sigun ki House Committee on Government Reorganization Chairman asin Bulacan Representative Salvador Pleyto, kabali digde an House Bill 4453 na pigsunad ni Mamamayang Liberal (ML) Party-list Representative Leila de Lima asin iba pang kongresistang miyembro kan minorya siringman an House Bill 5699 ni Navotas Representative Toby Tiango.
Pigsambit man ni Pleyto na magsasagibo sinda nin hearing sa duwang prosopwesto sa November 11 asin nagtutubod na mayong kongresista an makontra digde huli ta para ini sa ikakamarhay kan mga Pilipino asin tanganing matapos na an mga korapsyon.
Pigsaysay pa ni Pleyto na target ninda na sa November 13 maisalang na sa ikaduwang pagbasa sa plenaryo an consolidated version kan mga prosopwesto tanganing sa November 17 maipasar na ini sa ikatolong pagbasa asin maisumiter na man sa Senado.
An counterpart bills man kaini sa Mataas na Kapulungan an pigsunad ninda Senate President Tito Sotto asin Senator Risa Hontiveros.
