Pig-omaw kan United Nations an kapreparaduhan kan Pilipinas antes pa man an nagin panlalamasa kan Super Typhoon Uwan.
Sigun ki UN Resident and Humanitarian Coordinator Arnaud Peral, an episyenteng pagpepreparar, pre-emptive evacuations asin iba pang napapanahong pagresponde an mayong alinlangang nakapagsalbar kan kadakol na buhay.
Binanggit man kan UN Office for the Coordination of Humanitarian Affairs an pigsasagibo kan gobyerno kan Pilipinas na response asin recovery efforts kasunod kan saro sa pigkokonsiderar na pinakadakulang pre-emptive evacuation na naikurit sa historya kan nasyon.
Marurumduman na nag-abot sa 1.3 milyong indibidwal an pig-ebakwar sa 13 gikan sa 18 rehiyon antes pa man mag-landfall an Super Typhoon.
Mientrastanto, nagpatanid an UN na mas kadakol pang makukusog na bagyo siring kan Uwan an pwedeng maeksperyensiyahan kasabay kan pag-init kan mga kadagatang nakapalibot sa Pilipinas dara kan krisis sa klima.
Kaya pigtawan-duon ni UN Secretary-General deputy spokesman Farhan Haq na labing importante an magkakaibahang pagpepreparar sa mga epekto kan kalamidad.
