Inihayag kan Department of Health (DOH) na igwa sindang 1, 823 dae natapos na health centers na pigkakarkulong nagkakatindad nin P32.4 billion.
Sigun ki Sen. Pia Cayetano, an mga health centers na ini an parte kan Health Facilities Enhancement Program, alagad dae pa kaibahan an kantidad kan mga dae natapos na pasilidad sa saindang P262.8 billion budget proposal para sa 2026.
Sa sarong interpellation sa Senado, hinapot ni Sen. Loren Legarda kun kaibahan na ba an P32 billion sa alokasyon, simbag ni Cayetano na dae pa ini kaibahan sa National Expenditure Program (NEP), asin ipinaliwanag na kaipuhan pa nindang tukuyon kun arin an mga pasilidad an madali sanang pakarhayon.
Nakilhag si Legarda dae pag-iba kan pondo para sa mga dae natapos na pasilidad, huli ta sigun sa Department of Budget and Management, primerong prayoridad ninda dapat an pagtatapos kan mga dae natapos na proyekto kaysa magpatindog liwat nin mga bago.
Sigun ki Legarda, kun dae mapondohan an P32 billion para sa mga dae natapos na health centers, kadakol na mga tawo sa probinsiya an kaipuhan maghalat pa nin sarong taon antes magamit an saindang mga ospital.
Pinaliwanag ni Cayetano na an nagkapira sa mga pondo para sa pagkumpleto kan nagkapirang health centers an nakasaysay na sa Tier 1, alagad kadakll pa man an nawalat sa Tier 2.
Binanggit man ni Legarda an pauru-utrong problema kan mga dae natapos na pasilidad sa DOH.
Paliwanag kan DOH, ini an huli sa saindang zero budgeting system, na naglilimitar sa saindang kakayanang maghagad nin pondo kun saen pighahapot sana sinda kun arin sana sa pondo an kaya nindang ma-consume sa sarong taon.
