NAGA CITY – Pigtawan duon kan Department of Trade and Industry Camarines Sur an importansiya kan pagkakaigwa nin Halal Restaurant sa Bicol na sarong dakulang tabang sa Muslim Community.
Sigun ki Jay Percival Ablan DTI Camarines Sur Provincial Director, marhay na bareta para sa mga tugang na Muslim huli ta igwa nang 20 establishmento kan Halal an makukua sa Rehiyon.
An Halal iyo an mga produkto na pwede sa Muslim Community asin igwang overall purpose sa sainda.
An Halal boot sabihon lawful o “permissible sa batas kan Islam na bako sana sa pagkakan kundi mga cosmetics, pharmaceuticals, asin chemicals. An mga produkto na tatak Halal an nagrerepresentar nin ethical asin high-quality standards sa global industries.
Katakod digde, kamawotan ni Ablan na mas madugangan pa an certified Halal Restaurant sa kabikolan tanganing mapanuan an gabos na pangangaipuhan kan Muslim Community.
Sa ngunyan, naglalaom na sana an opisyal na maabot an panahon na magkakaigwa nin certified halal sa siyudad nin Naga tanganing dae naman madipisilan an mga Muslim maghanap nin mga produkto na para sa sainda.
