NAGA CITY- Pigheras kan pamayuhan kan Brgy Concepcion Grande Naga City an mga lakdang na ginigibo tangani mamantinir an peace and order sa lugar.
Sa entrevista kan Bombo Radyo Naga ki Jerold Rito, Barangay Captain, Concepcion Grande, sinaysay kaini na nagkukundusir sinda nin 24/7 na roving katuwang an saindnag mga Brgy Tanod.
Katakod kaini, nagpapalaag pa sinda nin mga dugang pang CCTV cameras sa lugar tangani mas salbado an mga kahimanwa orog na an mga nasa aralanganin na lugar.
Pigtawan duon pa ni Rito na apwaera kan mga nasambitan ng lakdang, mahigot na nagpapagirumdom pa an saindang lado manungod sa pagigin vigilante sa kapalibutan asin pagpasiguro kan mga kanya-kanyang pagsasadiri.
Nagkakanigo na dae matawan nin pagkakataon an mga mapansamantala tangani makabwelong gibo nin maraot sa iba.
Sa ibong na lado, pigsisiguro man ninda na salbado an mga kajovenan sa Brgy na kun saen mas strikto an saindang pinapautob na curfew.
Sa paagi kaini, kun igwa man sinda nin mahiling na mga kaakian na nasa luwas kan mga harong nin dis oras nin pagkabanggi, saindnag kinakaulay na an mga magurang sa Brgy.
Sa ngunyan, pinapagirumdom na sana kan opisyal sa mga kahimanwa na magsunod sa ano man na pigpapautob kan mga opisyales sa lugar tangani masigurong salbado an gabos sa ano man na peligro.
