PIGBUYAGYAG ni Baguio City Mayor Benjamin Magalong na habo kan pamilya ni dating DPWH Undersecretary na si Maria Catalina Cabral na isairarom sa autopsy an saiyang lawas.
Sigun sa alkalde, napagdesisyunan na ini kan magkakapamilya. Ini an taliwas sa naenot ng report kan Department of Interior and Local Government (DILG) na magsairarom na sa autopsy an lawas kan nagtalikod na sa kinaban na undersecretary.
Hurot ni Magalong na dati mang nagsirbi komo pamayo kan Criminal investigation and Detection Group, mas marhay kudta nang isairarom sa autopsy an lawas kan nagadan na opisyal, orog na ta kahina-hinala an insidente kan saiyang pagkagadan.
Hasta sa ngunyan, nagtitinir na palaisipan kun nagpagadam an dating opisyal o kun igwang foul play sa saiyang pagkagadan makaligis na marecover an saiyang lawas sa sarong bangim sa banwaan kan Tuba, Benguet kan nakalihis na Disyembre 18.
Enot na digde nag-apelar an Independent Commission for Infrastructure na magkaigwa nin hararomang imbestigasyon sa pagkagadan kan dating opisyal tanganing matukoy kun igwang foul play na nangyari.
Nagtitinir man na nasa kostudiya kan mga otoridad an driver ni Cabral na si Ricardo Munos Hernandez.
Si Hernandez an pinagtutubodang huring nakahiling ki Cabral antes ini nanutarang gadan.
