Pigbugtak kan Civil Aviation Authority of the Philippines (CAAP) sa heightened alert status an gabos kan palupadan sa bilog na nasyon huli sa piglalaoman na pagdagsa kan mga pasahero ngunyan na Pasko asin Bagong Taon.
Sigun ki CAAP Director General Retired Lt. Gen. Raul Del Rosario, kasalbaduhan asin kaginhawaan kan mga pasahero an saindang premirong prayoridad.
Nakalatag na an mga Malasakit Helpdesk sa mga palupadan tanganing mag-alalay asin mag-aksiyon sa mga concern kan mga pasahero asin turista.
Mientrastanto, nagtitinir man na naka-heightened alert an mga security personnel tanganing magtinir an kaayusan asin masierto an kasalbaduhan kan mga pasahero.
Naka-standby na man an mga medical team para sa tolos na pagsimbag enkaso may emerhensiya.
Nakikipagkoordinar man an CAAP sa manlaen- laen na ahensya, kaibahan an PNP–Aviation Security Group, Office for Transportation Security, Department of Tourism, asin Civil Aeronautics Board, tanganing masierto an marhay asin episyenteng pagproseso kan mga pasahero, orog na sa mga check-in counter.
Piglalaoman kan CAAP na mapakol sa 960,000 pasahero an madagsa sa mga palupadan ngunyan na holiday season—7 porsiyentong mas halangkaw kumparar sa 895,000 pasahero na nairehistro kan nakalihis na taon.
Pigpapagirumduman man an publiko na magin mapagmatyag, magsunod sa mga airport protocol, asin makipagkoordinar sa mga security asin airport personnel tanganing masierto an kasalbaduhan asin episyenteng operasyon kan mga palupadanan ngunyan na holiday season.
