Pig-inkaminar kan Office of Public Counsel for Victims (OPCV) an International Criminal Court (ICC) na itakda na an confirmation of charges hearing laban ki dating Presidente Rodrigo Duterte nin mayong pagkauktaba.
Ini an kasunod kan unanimous decision kan medical experts panel na ‘fit to stand trial” si dating Presidente Duterte.
Sa sarong confidential filing sa Pre-Trial Chamber I, sinaysay ni OPCV Principal Counsel Paolina Massidda na nagpapahiling an joint asin individual reports kan medical experts na mayong medical condition an dating Presidente na makaka ulang sa saiya tangani hampangon an pre-trial proceedings.
Pigtawan duon man ni Massidda na kwalipikado an mga biktima para sa expeditious process, huli ta nag desisyon na an medical experts na “fit” an dating Presidente na hampangon an pag-uusig laban sa saiya.
Alagad, sa panig man kan defense team ni Duterte, maduon nindang tinutulan an findings asin ikinatuwirang bagaman naiintindihan kan dating Presidente an nature kan criminal process asin kayang maglaog nin apelar, an saiyang short-term memory an “demonstrably impaired.”
Sigun sa depensa, dawa na madangog kan dating Presidente an ebidensiya sa korte, madali kaining malilingawan asin madidipisilan na makumpara ini sa ibang ebidensiya kaya man katwiran kan depensa, nararaot an pagigin patas kun dai kayang depensaran kan suspect an saiyang sadiri o dai kayang matawan nin instruction an saiyang abogado.
Tinukoy man kan depensa an internal contradictions kan mga eksperto sa pirang punto kabali na pag abot sa pagigin maluya kan dating Presidente, pagkawara kan pandangog asin dae maipaliwanag na pagniwang asin pagigin “unreliable historian” sa saiyang sadiring salud asin mga sintomas.
Katakod man kaini, hinagad kan depensa sa Pre-trial Chamber na mag-convene nin sarong “evidentiary hearing” tangani klaruhon an konklusyon kan mga medical expert, methodologies asin iba pa, kun saen an siring na mga pagdangog soboot an sarong standard practice sa kadakol na jurisdictions asin man sa international tribunals.
