Matutok an Philippine National Police (PNP) sa pagkua asin pag-secure kan ebidensya katakod kan pagkagadan kan dating undersecretary kan Department of Public Works and Highways (DPWH) na si Maria Catalina Cabral, makalihis madukayan an saiyang lawas sa Benguet.
Sigun ki PNP Acting Chief Police Lt. Gen. Jose Nartatez Jr., iniinterogate an driver ni Cabral makalihis kaining iwalat an opisyal kan Huwebes sa Kennon Road sa Tuba, Benguet, alinsunod sa kahagadan ni Cabral. Sa pagkumpirmar kan saiyang pagkagadan, nalinawan na an mga spekulasyon manungod sa pagkakabistuhan kan lawas.
An masunod na lakdang an aramon an tunay na nangyari, asin ini an presenteng pokus kan nasambitan ng imbestigasyon, dugang pa ni Nartatez.
Si Cabral, dating undersecretary para sa planning asin public-private partnerships kan DPWH, an idineklarar nang gadan kan mag oomagahon kan Disyembre 19 makalihis ining madukayan na mayong malay asin dae na nagsisimbag pa sa gilid kan Bued River, poco mas o menos 20 hasta 30 metro pababa kan Kennon Road, sarong aldaw antes ini.
Inabisuhan kan Office of the Ombudsman an mga awtoridad sa Benguet na i-secure an cellphone asin iba pang gadgets ni Cabral.
Mientrastanto, nagsagibo nin paghahanap an National Bureau of Investigation (NBI) sa hotel room ni Cabral sa Baguio City tangani makakua nin ebidensya manugod sa mga pangyayari sa saiyang pagkagadan.
Sigun ki Nartatez, nakikipag-koordinar man an PNP sa Independent Commission for Infrastructure asin iba pang katakod na ahensya tangani na tukuyon an mga ebidensyang dapat ma-secure katakod kan imbestigasyon sa flood control projects.
Antes an saiyang pagkagadan, nakatakda an Department of Justice na i-refer sa Ombudsman an plunder case laban ki Cabral, katakod kan soboot anomalya sa flood control projects sa Bulacan.
Tangani na malikayan an ano man na lapses, pinagsugo ni Nartatez an mas istriktong superbisyon sa mga lokal na police units na nagkakapot sa kaso ni Cabral, kasunod kan pagpapa-relieve sa posisyon kan hepe kan Tuba, Benguet Police.
Bako sana ini tangani linawon an mga pangyayari sa saiyang pagkagadan kundi tangani suportaran man an imbestigasyon kan kapulisan sa soboot anomalya sa flood control kan DPWH tangani mayong ebidensya an makaligtaan
