Pigkakarkulong 16 na katao an binawian nin buhay mantang 18 pa an irido sa sarong malagim na aksidente kan pampasaherong bus sa Indonesia, makalihis ining bumangga sa concrete barrier sa Java main island, mag oomagahon kan Lunes, Disyembre 22.
Basado sa report kan mga awtoridad, pasiring kuta sa syudad kan Yogyakarta an bus gikan sa kabisera, Jakarta, kan mangyari an nasambitan ng aksidente sa curved exit kan Krapyak toll road.
Sigun sa inisyal na imbestigasyon, sumobra sa liko an bus mantang marikas an dalagan kaini, rason tangani mawaran nin kontrol an driver asin bumangga nin makusog sa konkretong ulang. Huli man sa kusog kan impact, nagkapirang pasahero an naka apon paluwas kan lunadan asin naipit sa laog kan wasak na bus.
Anom na pasahero an idineklarang dead on the spot, mantang sampulo pa an isinugod sa manlaen-laeng ospital alagad dae nag haloy, binawian man nin buhay huli sa grabeng danyos na sinapo.
Padagos man na binubulong an 18 irido, nagkapira sa sainda an nasa kritikal na kondisyon. Sigun ki Budiono, hepe kan search and rescue team, pirang minuto an naglihis antes na dagusang maka abot sa lugar an mga pulis asin rescue personnel.
Tulos sindang nagsagibo nin rescue operation asin nagtao nin pangenot na lunas sa mga biktima, alagad mayo nang nagibo para sa mga pasaherong nagadan na sa lugar kan insidente.
Mientrastanto, padagos na nagpaparahay sa ospital an driver kan bus makalihis magsapo nin malalang danyos. Inihayag kan mga awtoridad na sasairarom ini sa drug test asin man masusing imbestigasyon tangani na matukoy kun may pagbalgar sa speed limit, kapabayaan, o iba pang salik na nagin kawsa kan aksidente.
