Ipinadara kan Philippine Coast Guard (PCG) an mga personahe asin barko kaini tanganing magpartisipar sa 24th Regional Marine Pollution Exercise sa Bitung–Manado, North Sulawesi, Indonesia.
Naghali an PCG contingent sa pier 13, South Harbor, Manila kan Oktubre 2 bilang pagpreparar sa gigibuhon na maritime exercise poon Oktubre 8 sagkod Oktubre 12.
Kaiba sa mga sasakyang-dagat na mapartisipar an BRP Gabriela Silang asin BRP Tubbataha, kaiba an mga personahe hale sa Marine Environmental Protection Command, Special Operations Force, Medical Service, asin Nursing Service.
Katuyuhan kan Regional MARPOLEX na pakusugon an koordinasyon asin kahandaan kan mga partisipanteng nasyon sa pagresponde sa oil pollution, hazardous and noxious substances, rescue operations, asin iba pang marine emergencies.
An aktibidad pamamayuhan kan Directorate General of Sea Transportation kan Indonesia, katuwang an Japan Coast Guard. Segun sa PCG, makakatabang an pagsasanay sa pagpakusog kan regional cooperation asin kakayahan sa pagresponde sa mga insidenteng posibleng makaapekto sa kadagatan.
