Pupuonan na ni Presidente Ferdinand Marcos Jr. an pagrerebisa sa pagkakaiba sa pag-ultanan kan National Expenditure Program (NEP) asin 2026 General Appropriations Bill (GAB) na inaprubaran sa bicameral conference committee.
Ini an sinaysay kan Malakanyang, sarong semana antes pa an nilalaomang ratipikasyon asin turnover kan spending plan gikan sa Kongreso pasiring sa Ehekutibong sangay kan gobyerno.
Sigun ki Communications Secretary Dave Gomez sa masuring pag review na masisiguro na an kwarta kan mga taxpayers an mapapasiring sa maray na paggagamitan. Pigsierto man kan opisyal na matrabaho an Presidente dawa ngunyan na holidays.
Enot digde, dae pa magigin preparado an 2026 national budget hasta sa Pasko, makalihis na ibalyo kan Senado asin Kamara de Representantes an aldaw para sa pagraratipika kan propwestong badyet.
Sinaysay ni Senate finance committee chairperson Sherwin Gatchalian na obheto ngunyan kan duwang kapulungan na iratipika an P6.7-trilyong spending bill sa Disyembre 29, na sarong semana makalihis an naenot na target sa Disyembre 22.
Sinaysay ni Gatchalian na isinaalang-alang man kan bagong timeline, na ikinonsulta man ki House appropriations panel chairperson Rep. Mika Suansing, an Noche Buena asin Pasko.
Obheto nindang ipadara an naratipikarang propwesto sa badyet sa Office of the President sa hapon kan Disyembre 29. Huli man digde, may duwang aldaw sana si Presidente Ferdinand “Bongbong” Marcos Jr. tangani pirmahan an pambansang badyet para sa 2026 asin mag-veto nin mga item, kun kinakaipuhan.
Sa ibong kan paghihidali, sinaysay ni Suansing na may bastante na oras man an ehekutibo tangani suriong marhay an 2026 General Appropriations Bill (GAB).
An pagsasaayos sa nauktabang timeline kan badyet an nangangaipuhan nin saro pang pagbabago sa kalendaryo kan lehislatura, na plano man na isakatupadan kan parehong kapulungan sa Lunes, sigun ki Suansing.
Sinaysay ninda Gatchalian asin Suansing na tiwala sindang mayong ibe-veto an Presidente sa ano man na item sa propwestong pambansang badyet.
