Pupwedeng kaipuhanon kan Bangko Sentral ng Pilipinas (BSP) na ipagpauktaba muna an dugang na pagbaba kan interest rates tanganing magtinir an kakayahang mag-angkop kan polisiya kontra sa mga panluwas na peligro asin masuri an epekto kan mga naenot na easing measures, sigun sa New York-based think tank na GlobalSource.
Pigsaysay kan mga ekonomistang sinda Diwa Guinigundo asin Wilhelmina Manalac kan GlobalSource na pupwedeng tawan-katwiran kan naglulumoy na inflation asin nagluluyang paglago an dugang sa pagbaba kan rates, importante man na isaalang-alang an kalikasan kan pagbabagalan kan ekonomiya asin kun paano hihilingon kan merkado an mga lakdang kan polisiya.
Piglinaw ninda Guinigundo asin Manalac, na kapwa dating halangkaw na opisyal kan lokal na central bank, na an pause dae boot sabihon paglipat sa mahigot na monetary policy.
Naenot nang nagtao nin pahiwatig an economic team ni Presidente Marcos na pupwedeng baguhon an opisyal na macro targets tanganing isaalang-alang an epekto kan naglalalang kampanya kontra katiwalian. Komo “kompensasyon” sa epekto kan kampanyang ini, pigbaba kan BSP an overnight borrowing rate kan dugang na 0.25 percentage point sa 4.5 porsyento sa huring policy meeting kan Monetary Board ngunyan na taon.
Huli digde, nagpakol na sa kabilogan na 2 percentage points an mga tapyas puon kan magpuon an easing cycle kan Agosto kan nakalihis na taon.
Mientrastanto sinabi ni Governor Eli Remolona Jr. na anuman na dugang rate easing sa masunod na taon limitado sana sa sarong 0.25 percentage point na tapyas.
Dugang pa kan BSP chief, lilikayan pa man kan central bank an darakulang bawas asin off-cycle decisions na pupwedeng magkawsa nin kariribukan sa merkado.
Sa saindang pahayag, pigtawan-duon ninda Guinigundo asin Manalac na an pagpupugol sa dugang na rate cuts an makakatabang tanganing malikayan an persepsyon na piggagamit an monetary policy tanganing punan an kaluyahan sa pananalapi o institusyon.
