NAGA CITY- Nagtitinir na salbado an mga Pipino na yaon sa nasyon kan Thailand sa ibong kan nagpapadagos na tensiyon sa pag-ultanan kan Cambodia asin Thailand.
Sa report ni Bombo International News Correspondent Joash Cariaga, PE Teacher gikan sa Thailand, sinaysay kaini na mahigot na pigtututukan kan Department of Migrant Workers (DMW) asin kan gobierno kan Pilipinas an kamugtakan kan mga Pilipinong naapektaran kan nagpapadagos na tensyon sa border kan Thailand asin Cambodia.
Sigun pa ki Cariaga, iba-iba an komento kan magkaibong na lado dapit sa kun siisay an nagpuon kan pag-atake alagad sa ibong kaini prayoridad kan mga Pinoy na apektado kan kariribukan an saindang kasalbaduhan.
Marurumduman, enot nang pigsaysay kan DMW kadaklan sa mga apektado an mga paratukdo asin non-teaching personnel na nagtatrabaho sa mga eskwelahan harani sa border kan Thailand na paramientras na pig-ibakwar huli sa sitwasyon.
Nagtao namn an ahensiya nin financial assistance para sa pangenot na pangangaipuhan kan mga paratukdo na paramientras na nawaran nin trabaho huli sa kariribukan.
Mientrastanto, naglalaom man si Cariaga na magigin matrayumpo an liwat na pagsasagibo nin pag-uulay sa pag-ultanan kan Thailand asin Cambodia tanganing mapakusog an ceasefire sa saindang hangganan makalihis an madugong sagupaan.
Sa ngunyan, naglalaom na sana si Cariaga na magtinir na salbado an mga Pinoy na apektado kan nasambitan ng kariribukan.
